مافيه أحد ..!!

اليوم خلصت إختبار الفيزيكال كيمستري .. يعني الماده هذي خلصتها ...

يوم الأحد الماضي خلصت منهج الاورقانك كيمستري .. والحمد لله .. المادتين

أحس إني جبت فيهم نتيجه طيبه .. الله مهوب مضيع تعبي .. اتمنى ماانصدم مثل

كل مره .. اطلع من الاختبار مبسوط وأتفاجئ بالنتيجه بعدين :(

باقي إختبار الفزكس .. جعل مابه فزكس .. ماني مصدق أخلصها .. ماده ماتنبلع

ابد .. وما لها دخل بتخصصي .. يقولون اننا ندرسها عشان فيه اشياء بمواد التخصص

متعلقه بها .. المهم اني بخلصها وبرتاح منها .. ماده تجيب الهم ...

فيه أشيااااء واجد ودي اتكلم عنها .. فيه أشياء مستحي منها .. وأشياء ناسيها ..

الأشياء اللي مستحي منها .. مدري وين أكتبها .. لو فيه رقم سري لكل تدوينه أدونها ..

يعني احط رقم سري للأشياء اللي ماابي احد يقراها ..  ودي أفضفض .. لكن مافيه أحد :(

مافيه أحد أقدر أقوله الاشياء اللي استحي اقولها لاحد غيره :(

أحياناً أتكلم مع أخوي الصغير ( 10 شهور ) وأفضفض له .. لأني ادري انه ماراح يفهم 

ولا راح استحي منه .. واحيانا افكر اشتري كلب .. يقولون انه احسن صديق للانسان

طبعا .. (الكتاب) جماد ولا اقدر افضفض له .. مع انه خير جليس ..

المهم انه ضايق صدري .. صار لي اسبوعين .. ولا لي نفس آكل شي .. وحالتي حاله ..

مدري .. عشان الاختبارات ؟؟ ماخبرت نفسي خواف من الاختبارات .. والله اني ادخل 

الاختبار .. باابرد اعصاب .. مااكأن فيه إختبار أصلاً ..!!

كل مابغيت افضفض لأحد واقول هذا ينفع لي .. القى فيه شي .. كأني ابغى واحد كامل 

مافيه عيب !! ليش أنا كذا ؟؟ مكتوب لي ابقى وحيد ..؟؟؟ ابقى وحيد ليش لا .. أنا متأكد

إن الله يبي لي الخيره - سبحانه -

الدنيا هذي ماتصلح لي .. انا في المكان الغلط .. حاولت اتأقلم معها .. لكن مافيه فايده !!

22/6/2010