اسلوبي بعض الأوقات يجيب الهم .. مدري ليه .. وراثه ، نفسيه ، عاده ؟؟!!
والمشكله مع شين الطبايع .. ازعل من اللي يصير اسلوبه معي خايس !!
اتمنى من كل قلبي .. إن كل اللي يزعلون مني يسامحوني .. ويعرفوني زين ..
وبالمقابل اتمنى ان الحساسيه الزايده تروح مني .. لأنها من جد تعبتني ..!!
مشكلتي مااعرف أجامل .. ومافيه شي يعجبني .. فتزيد "فظاظتي " مع الناس
انتقد هذا .. واستهزي بهذا .. احاول قد مااقدر ابقى ساكت .. لأني لو تكلمت
يصير كلامي مثل وجهي .. الله يعين :(
وأكثر من يتضرر مني .. اللي أحبهم .. لأني متعود عليهم ومثل مايقولون
(الميانه بيننا طايحه) .. فأقول كلام المفروض مااقوله ..!!
اليوم أخوي "منصور، 12 سنه" طلع من المستشفى .. مسوي عمليه في أنفه ..
المسكين تعبان من الأدويه وينام كثير .. فصرت استفزه ..( انت مسوي عمليه
في الخشم ليه تتسدّح كأنك مذبوح .. قم ، تحرك ، العب .. لا تتدلع علينا انت
وخشمك ) أنا الوحيد اللي اقول هالكلام بالبيت .. امي واخواني يقولون له اقعد
لا تتحرك ، تبي شي ، محتاج شي .. وأنا عكسهم بالضبط ..!!
عشان كذا انا منيب محبوب .. إلا مع الناس اللي معرفتي بهم سطحيه ..
لأن اسلوبي معهم أرقى .. لكن كلها مسألة وقت ويعرفوني على حقيقتي ..
الحقيقة المرّة :(
20/5/2010
0 التعليقات:
إرسال تعليق